El Foro Comunicación y Escuela pon el focu nel papel de la muyer na sociedá

Desenvolver en formatu ‘online’ la programación de la decimotercer edición del Foru Comunicación y Escuela qu’entama’l IES Elisa y Luis Villamil d’A Veiga ta suponiendo tou un retu y desafíu, dende enantes de qu’entamara esti llunes 12 d’abril.

El proyectu educativu céntrase, anguaño, nel papel de la muyer na sociedá actual. «Nun país democráticu como’l nuesu, la igualdá de sexos tien de ser un oxetivu irrenunciable y efectivu que tien de ser potenciáu dende la escuela», destacó ayeri’l coordinador y docente Luis Felipe Fernández mientres la presentación de la edición que lleva por lema ‘Muyer y sociedá nel sieglu XXI. Muyeres que camuden el mundu’.

Representantes femenines de distintos ámbitos van tar presentes nes actividaes que se van desenvolver mientres los próximos meses. Destaquen charres y conferencies con investigadores, escritores, deportistes y muyeres con cargos de responsabilidá nes Fuerces Armaes, el Parlamentu Européu, l’Hospital Universitariu Central d’Asturies (HUCA), la Biblioteca Nacional d’España y empreses como ALSA o Facebook. Tamién se va homenaxar a la bioquímica valdesana Margarita Salas, finada en 2019, y al escritor Miguel Delibes, nel centenariu de la so nacencia.

L’alcalde de Castropol, Francisco Vinjoy, destacó la selmana pasada na presentación del programa la importancia de la temática «nun momentu nel qu’esa igualdá real entá nun se consiguió. Hai enforma trabayu por faer por que suman les desigualdaes ente home y muyer», apuntó. El rexidor d’A Veiga, César Álvarez, destacó’l proyectu que lidera Luis Felipe Fernández y que supon «una oportunidá pal desenvolvimientu personal de los alumnos».

Programación

Abril

Xornada inaugural col conseyeru de Ciencia, Borja Sánchez (día 12).

Xornada lliteraria cola investigadora del CSIC María del Carmen Martínez (día 13)

Alcuentros cola escritora Ana Alcolea (día 21) y Maite Carranza (día 26)

Mayu
Conferencia cola teniente y el capitán de navío del Cuerpu d’Infantería de l’Armada, Clara Jiménez y Diana Antón (día 4)
Xornada lliteraria con Violeta Monreal (día 19)
Conferencia colos diputaos del Parlamentu Européu Isabel Benjumea y Jonás Fernández (día 21)

Xunu
Clase col futbolista del Manchester United Juan Mata (día 2)
Conferencies de la directora de sostenibilidá de EdP, María Casares, (día 21) y cola inxeniera Carmen Molejón (día 22)

Setiembre

Conferencia de la fía de Margarita Salas, Lucía Viñuela (día 30).

Ochobre
Xornada al cargu de la directora xeneral de Facebook Iberia, Irene Cano (día 5)
Conferencia de la capitana y la xugadora de la selección española de fútbol playa femenín, Laura Gallego y María Yenes
Conferencia del presidente del Principáu, Adrián Barbón (día 7)

Payares
Conferencies del epidemiólogu Daniel López Acuña (día 17) y de la directora de la Biblioteca Nacional d’España, Ana Santos Aramburu
Xornada de clausura (día 19).