Portada Educación Avilés sumase al proyectu européu “La voz de la mocedá al traviés d’una radio dixital europea”

Avilés sumase al proyectu européu “La voz de la mocedá al traviés d’una radio dixital europea”

by redacción asturnews

El programa Radiadora, una iniciativa radiofónica dixital de la conceyalía de Mocedá d’Avilés, va participar nel proyectu européu “La voz de los mozos al traviés d’una radio dixital europea”, que na so primer fase entamó esti llunes 12 d’abril, con un cursu de formación que se va enllargar hasta’l próximu domingu, día 18.

La persona que va recibir la formación va ser Fabio Meazza -que foi voluntariu européu n’Avilés,  onde s’instaló en rematando’l so voluntariáu- qu’al pie de Penélope Proenza, son los encargaos de coordinar Radiadora. Una vegada completada la formación, va treslladar al restu de mozos que cunten con programa de radiu na emisora avilesina.

Radiadora ye la radio on line del Serviciu de Mocedá d’Avilés, con más de diez años de trayectoria, na que moces, en grupu o de forma individual, fórmense y desenvuelven programes que se graben nel Edificiu Fueru, y pueden descargase al traviés de la so propia páxina de Facebook (Radiadora Avilés) y la plataforma Mix Cloud.

La grabación de programes suspendiérase por cuestiones de salú rellacionaos col COVID, y dende va un mes volvió l’actividá, con toles midíes de seguridá necesaries. Anguaño cunta colos espacios “La farándula”, “Fora d’esti mundu”, “L’autobús”, “Qué diz la mocedá”, “El visillu” y “L’audiu de la mio amiga”.

Más información

Tamién te podria gustar