Dixebra va celebrar n’Avilés so XXX aniversariu

Dixebra va celebrar n’Avilés so XXX aniversariu
12 xunetu 16:11 2017 Imprimir

Dixebra va celebrar n’Avilés so XXX aniversariu esti xueves próximu a les 22,30 hores dientro de los actos programaos del festival Sol Celta, pero nesta ocasión con un formatu qu’anuncien va ser mui distintu.

Hai diez años Dixebra festexaba les sos dos décades de trayectoria ininterrumpida con un conciertu mui especial na ciudá que los vio nacer, asina na avilesina Plaza d’El Parche axuntábense más de tres mil persones pa corear xunto a ellos canciones que son yá himnos. D’aquella actuación, na que participaren como collaboradores figures de la música asturiana como Xosé Ambás o Dark la eMe ente otros, amás de Los Sidros, publicóse un trabayu discográficu y audiovisual tituláu Dixebra n’acción.

Agora, por cuenta del so trenta aniversariu, vuelven a tocar n’Avilés. Va ser esti xueves próximu (a les 22:30 h.) dientro de los actos programaos del festival Sol Celta, pero nesta ocasión el formatu va ser mui distintu. L’escenariu asitiáu na Plaza’l Sol, va acoyer lo que quieren que seya tamién un conciertu especial, y ye que los músicos de Dixebra nagüen asina por facer alcordanza de los sos primeros pasos, cuando tocaben nos pequeños locales qu’a finales de los 80 y primeros de los 90 programaben actuaciones en directo na ciudá avilesina. Nesti sen, na memoria de munchos aficionaos y aficionaes, tán tovía nel recuerdu nomes como l’Estados Ruidos (na cai La Ferrería), el Country Bar (na plaza Maspalomas) o’l Cactus (primero en San Xuan y depués na cai Rivero), onde Dixebra empezó a dase a conocer y a coyer «tables». El conciertu d’esti xueves quier recordar esi tipu de conciertos, cuando la proximidá col públicu produz una mayor comunicación y interacción colos músicos, dalgo que Dixebra nun escaeció en tou esti tiempu de vida.

Otra manera, quieren tamién mostrar el so apoyu a esti tipu de festivales de formatu pequeñu y autoxestionaos, que dan vida y color a les zones onde se desenvuelven y na que los músicos locales son los protagonistes. Asina, la primer fecha del Tour 87-17 decidieron facela nel pueblu de Valles (Piloña), na sala que l’asociación Bocanegra tien ellí. Per otru llau la xira actual va llevalos tamién a tocar en festivales de gran formatu como l’Arcu Atlánticu (Xixón), l’Intercélticu de Lorient, el Sauga Folk (Comillas) o l’Algarabía (Lalín).

  Categories:
Loading Facebook Comments ...