El Festival Arcu Atlánticu 2017 va ser “un mar de llingües” en Xixón

La exa temática escoyida pal Festival Arcu Atlánticu 2017 de Xixón van ser esti añu les llingües minoritaries, d’onde surde’l títulu “Un mar de llingües” col que acaba entamar a asoleyase nes redes.

La situación del asturianu como llingua minoritaria nun ye la única nel Arcu Atlánticu ya qu’otros territorios que tienen llingües con problemes asemeyaos a los nuestros, foron quien a frenar la perda de falantes, meyorando bultablemente la situación de la so propia llingua. “Conocer les esperiencies d’estos territorios va ser una de les ofertes d’esti festival, convirtiéndose nun espaciu d’utilidá social al trabayar na superación de los prexuicios llingüísticos y del pesimismu alredor del propiu idioma que sienten munchos asturianos y asturianes”, sigún facía esti día anuncia la web de la Oficina de la Llingua de Xixón.

Actividaes centraes na promoción del asturianu, como los talleres o xuegos tradicionales del país, van permitir “enganchar” a la sociedá xixonesa y asturiana cola idea del Arcu Atlánticu y dar a conocer esta realidá cultural común, xenerando una conciencia cultural qu’abra pontes.

El contactu ente los pueblos favorez l’intercambiu económicu y cultural y por mor d’ello “elfestival aspira a ser un espaciu referente d’esi intercambiu. Los diferentes festivales de música celta que se cellebren dende va munchos años en casi tolos territorios atlánticos estimularen l’intercambiu ente les nuestres cultures. Dedicar el festival a las llingües minoritaries del Arcu Atlánticu va permitir que los habitantes de tolos territorios sigan afondando nesi intercambiu d’elementos culturales, conociéndonos más unos a otros. Nesti casu, les llingües del festival van ser: l’asturianu, el mirandés, el gallegu, l’eusquera, el bretón y l’occitanu”.