Avilés va aplicar nueves midíes de sofitu a la hostelería

El Conceyu d’Avilés estudia la posibilidá d’amontar les midíes de sofitu al sector de la hostelería énte’l nuevu escenariu abiertu tres l’anunciu, per parte del Gobiernu d’España de les distintes, fases del plan de desescalada.

Les condiciones impuestes a l’apertura parcial de los establecimientos comerciales motivaron que’l Gobiernu local, a la espera de que’l Principáu d’Asturies apruebe l’adaptación de les nueves normes al territoriu, tea yá trabayando na implantación de les mesmes, especialmente nes qu’afecten a l’actividá hostelera.

La conceyala de Comerciu, Raquel Ruiz, señaló que “ye importante dar facilidaes al sector hosteleru nestos momentos, y por eso vamos afaer los espacios de les terraces onde sía posible pa compensar l’amenorgamientu del aforu previstu mientres la desescalada. Amás, vamos ampliar el períodu mientres el que nun se cobrará a la tasa correspondiente”.

El pasáu 18 de marzu, el Conceyu d’Avilés anunció la suspensión de la tasa municipal de recoyida de basura pa toles actividaes que tuvieron que cesar la so actividá pol Estáu d’Alarma. N’ese mesmu momentu anuncióse que la tasa correspondiente a la instalación de les terraces d’hostelería nun se va liquidar mientres el tiempu en que l’actividá permaneciera suspendida.

Arriendes d’ello, la conceyala de Comerciu recuerda que nun se cobrarán tases de terraces nin basures mientres los díes que dure l’Estáu d’Alarma. Aquelles persones qu’hubieren pagu tol añu por adelantao antes de conocer esta situación, van tener derechu a solicitar la devolución del importe per estos díes”.

Ruiz esclaria qu’esta midida nun ye un aplazamientu o moratoria, sinón una suspensión, yá que “mientres nun se llevante l’Estáu d’Alarma nun se ta produciendo fechu imponible, por eso paralicemos les lliquidaciones”.