Yá hai ganador del concursu de creación de trasgos pa la Fiesta de la Sidra de Xixón

David García Ferrero ye’l ganador del primer concursu de diseñu de los personaxes (trasgos) de la Fiesta de la Sidra, convocáu pol Teatru Xovellanos. Esti concursu púnxose en marcha col enfotu de fomentar la creación artística nel marcu de la Fiesta de la Sidra Natural. L’oxetivu del mesmu ye escoyer los trasgos representativos de la edición númberu XXI de la citada Fiesta Los trasgos ganadores, que los sos nomes son Berto y Berta, van formar parte de la imaxe oficial que se va utilizar en distintos soportes, como vasos, programes o camisetes.

Nun ye la primer vegada que’l xixonés David García Ferrero gana un concursu convocáu pol Teatru Xovellanos, yá que en 2010 la imaxe qu’ilustró’l Antroxu xixonés foi obra so. Col so diseñu, que lleva por lema “Trasgos a la sidra”, alzóse colos quinientos euros colos qu’esti premiu ta dotáu.

El so interés pol dibuxu vien-y dende pequeñu. Y anque en principiu decantar por estudiar Bioloxía, finalmente la so vocación llevó-y a la Escuela d’Arte d’Uviéu, onde estudió Ilustración y espertóse el so interés pol diseñu. David ye l’autor del Osu Pericu de Bomberos d’Asturies, y con al respective de los trasgos de la Fiesta de la Sidra, afirma que buscó “da-yos una llínea gráfica más actual, que tuvieren ciertu “appeal”, pero que caltuvieren traces tradicionales nos sos traxes. Tienen una gama cromática llindada, pero efectiva, con cuenta de facilitar la so implantación como mascotes”.