Xixón celebra la romería de San Pedru nel Pueblu d’Asturies

La Conceyalía de Cultura Tradicional y Llingua Asturiana de Xixón vuelve a organizar la Romería de San Pedru esti sábadu. Una celebración que s’inspira nos escritos de Xovellanos y otres fontes posteriores recreando l’ambiente d’entós. Ente les actividaes Misa cantada con gaita, puya’l ramu, bailles, xuegos y deportes tradicionales y chigre.

A les once y media la mañana va fecese una procesión del ramu con gaites, xigantes y cabezudos. A les doce, misa asturiana de gaita nel Tendayu del Muséu del Pueblu d’Asturies, oficiada por J. Manuel García de Jesús, párrocu de San Antoniu de Padua (Uviéu) y Presidente del Coleutivu Manuel Fernández de Castro. Nel oficiu va cantar el grupu Muyeres.

A les 12:30, presentación de la Sidra de Manzana Asturiana de Selección nel llagar del muséu y una hora más tarde, bailles asturianos, al cargu d’Escontra’l Raigañu d’Avilés y Na señardá de Xixón.

Yá de tarde, a les 16: 30 hores, va xugase una partida de bolos, al cargu de la Peña Bolística Asturiana, mientres los neños faen xuegos tradicionales y talleres didáuticos.

A les seis, teatru de guiñol, al cargu de Tragalluz, cola obra “Histories de títeres”.

A les siete la tarde, va celebrase concursu de bailles asturianos, nes especialidaes de baille sueltu (al son de la gaita y el tambor) y agarráu (al son del organiellu). A les ocho y media entama’l pieslle de la xornada con un conciertu de música tradicional asturiana, al cargu de los grupos Gatos del Fornu y Los Ciquitrinos; finando con foguera y danza prima, a les doce.