La propuesta d’Oficialidá pal Congresu de la FSA apruébase nuna docena agrupaciones

Les Mocedaes Socialistes d’Asturies (JSA/MSA) foron de les primeres agrupaciones n’aprobar llevar una enmienda propuesta por Socialistes pola oficialidá al Congresu de la FSA-PSOE na asamblega, ue celebraren esti sábadu pasáu. La enmienda ye la mesma que va aldericase en venti agrupaciones.

A lo llargo de la selmana la enmienda que propón que la FSA asuma la oficialidá del asturianu dirá votándose nes más de 20 agrupaciones onde se presentó, ente les que tán toles principales por númberu de militantes. L’agrupación d’Uviéu yá la aprobó esti llunes y les mocedaes socialistes acaben sumase a la fola que pue trayer una nueva situación pala oficialidá nel internu del PSOE onde siempres hubo rocea a dar esti pasu que les demás formaciones d’izquierdes d’Asturies tienen cuantayá asumíu.

La enmienda propón sostituir l’artículu 367 de la ponencia marcu del 32 Congresu de la FSA-PSOE que se va desenvolver n’ochobre y plantega nel so entamu la  defensa y el reconocimientu de los drechos y de la plena igualdá xurídica de tolos ciudadanos y ciudadanes son señes d’identidá del Partíu Socialista y tán ente los sos llogros consiguir avances d’importancia pa distintes comunidaes que nun teníen garantizaos los sos drechos civiles.

Dende esi puntu de vista, y teniendo en cuenta tamién la necesidá de tomar midíes que garanticen la conservación d’un patrimoniu de la importancia d’un idioma, y de la cultura que lu acompaña, “va defendese que l’asturianu (y nel so ámbitu, el gallego-asturianu) seya xunto al castellán, llingua oficial n’Asturies, nel momentu nel que se produza una reforma del Estatutu d’Autonomía tal y como establez la Constitución española nel so artículu 3.2, buscando un modelu d’oficialidá d’aplicación progresiva y acordies coles circunstancies sociollingüístiques y a les necesidaes culturales d’Asturies”.

Mientres nun se produza esi cambiu nel Estatutu, “va reforzase la promoción nel usu institucional y públicu del asturianu y el gallego-asturianu na alministración pública y nos distintos organismos del Principáu d’Asturies, asina como nel sector priváu. Del mesmu mou, va fomentase l’usu de la llingua asturiana nos medios de comunicación, n’especial nel Ente de Comunicación del Principáu d’Asturies, desarrollando la Llei d’Usu y Promoción del Asturianu de 1998 en tolos sos artículos”.