Un periódicu alemán prepara un reportaxe especial sobre’l turismu de salú n’Asturies

Una periodista del diariu alemán “Saarbrücker Zeitung ” llega mañana a Asturies al envís de facer un reportaxe centráu na ufierta de salú y relax del Principáu. L’itinerariu, organizáu pola Conseyería de Cultura y Turismu en collaboración cola Oficina Española de Turismu en Düsseldorf, ofrez un completu percorríu que va mostrar a la redactora, hasta’l próximu domingu, los atractivos naturales y culturales qu’arrodien la mentada ufierta de descansu.

El viaxe traduzse nun reportaxe sobre Asturies como destín turísticu que va ser asoleyáu nel diariu más importante de la rexón alemana de Saarland (al oeste d’Alemaña, na contorna de Franckfurt). Con una tirada de más de 180.000 exemplares diarios, esti periódicu d’información xeneral ofrez un día a la selmana una páxina especializada en turismu, onde va inxertase próximamente la información d’Asturies.

Esta visita coincide cola campaña emprendida pol Principáu d’Asturies dende la selmana pasada n’Alemaña –ún de los sos principales mercaos emisores n’Europa­–, pa promocionar los sos recursos turísticos al través de presentaciones a medios de comunicación y profesionales del sector, puntos d’información turística y esposiciones, nos centros comerciales Globbetrotter de Colonia y Hamburg.