The Who anuncia una única fecha n’España dempués de siete años

La emblemática banda de rock The Who anunció que vuelve a España pa ufiertar un únicu conciertu’l próximu 14 de xunetu de 2023 nel Palau Sant Jordi de Barcelona. Los británicos anunciaron les primeres feches de la so xira europea en siete años, en ciudaes como Berlín, París o Florencia.

Pete Townshend, Roger Daltrey y la banda van interpretar temes de los casi 60 años de carrera musical, d’álbumes clásicos como Tommy y Quadrophenia, y otros cantares del so álbum ‘WHO’ de 2019, el so primer llanzamientu d’estudiu en 13 años. Los shows europeos de 2023 son una consecución de l’aclamada xira d’anguaño ‘The Who Hits Back’ per Estaos Xuníos, onde la banda compartió escenariu, en más de 30 ciudaes, con dalgunos de los meyores grupos d’América.

Según el comunicáu, la xira europea va cuntar cola banda al completu compuesta pol guitarrista y tamién vocalista Simon Townshend, el teclista Loren Gold, la segunda teclista Emily Marshall, el baxista Jon Button, la batería Zak Starkey y los coros de Billy Nicholls, xuntu col director d’orquesta Keith Levenson, la violinista principal Katie Jacoby y la violonchelista principal Audrey Snyder.

Pete Townshend aseguró que volver tocar en Barcelona tres casi una década ye “maraviyoso”, y confesó que la ciudá condal ye una de les sos ciudaes favorites. “Tengo que dicir qu’esti espectáculu ye unu de los que personalmente esfruto más que cualesquier otru que fixera nos 60 años que llevo trabayando con Roger. Tengo munches ganes de visitar estes formoses ciudaes para ver a los nuesos vieyos fans, y espero que conozamos a dellos nuevos”, aseguró.

Les entraes, qu’entá nun tán a la vienta, podrán adquirise el próximu 13 d’avientu al traviés de la páxina web de Live Nation.