“Europa Equí” entama una sesión informativa sobro voluntariáu européu

La Oficina de Movilidá Xuvenil Internacional d’Avilés, “Europa Equí”, entama una sesión informativa  a les 19 hores nel Edificiu Fueru sobro voluntariáu européu. Nella, les voluntaries Karolina Golas y Annalisa Micheletti, collaboradores en diverses actividaes del Serviciu de Mocedá, van esplicar les sos esperiencies con esti proyectu.

Esti plan del Cuerpu Européu de Solidaridá ta dirixíu a mocedá d’ente 18 y 30 años con ganes d’aprender al traviés de la realización d’una actividá solidaria nuna organización europea. Los gastos derivaos de l’actividá tán subvencionaos pola Comisión Europea.

Les estancies tienen una duración d’ente dos meses y un añu, magar hai proyectos que pueden llevase a cabu en períodos de dos selmanes a dos meses p’aquellos mozos que, por diversu razones, nun puedan realizar llargues estadíes.

El Voluntariáu Européu apurre esperiencia vital, aprendizaxe, conocencia d’idiomes, y la meyora del currículum. Los ámbitos de los proyectos de voluntariáu son bien variaos: mediu ambiente, asistencia social, inclusión social, cultura, creatividá, información xuvenil y educación non formal, ente otros.