La catedral de Viena recupera’l so órganu xigante dempués de 25 años

La catedral de San Esteban, en Viena, inauguró esti domingu’l so nuevu órganu xigante tres una inversión de trés años y trés millones d’euros, con una xornada de conciertos y servicios relixosos celebrada so estrictes midíes de seguridá por cuenta de la pandemia de Covid-19.

Unes 750 persones, toes con mázcaros y guardando la distancia de seguridá, asistieron a la consagración del preséu musical más grande d’Austria, qu’anovó y amplió l’órganu instaláu en 1960 y que por so insuficiente capacidá dexó d’utilizase fai 25 años.

L’órganu orixinal, consagráu en 1886, quedó destruyíu na quema qu’afaró’l templu a la fin de la II Guerra Mundial. El nuevu preséu tien 12.612 tuberíes y 185 rexistros, incluyendo los del órganu del coru, que quedó integráu nél.

L’arzobispu cardenal de Viena, Christoph Schönborn, bendixo l’órganu y de siguío ofició una misa matutina que duró casi dos hores y onde el principal protagonista foi l’órganu, al qu’acompañaba un coru. Dempués de la misa, munchos asistentes averáronse al mercadín dispuestu nun edificiu cercanu a la catedral nel que podíen adquirise les pieces del vieyu órganu que quedaron inservibles mientres la restauración del preséu. Los trés millones d’euros que costó la restauración del órganu fueron financiaos por donaciones particulares y aportaciones del Estáu.

Ente los participantes nos distintos actos d’inauguración tuvieron tanto’l presidente d’Austria, Alexander Van der Bellen, como miembros del Gobiernu central y del Conceyu de Viena. Darréu tuvo llugar un conciertu más sobriu, onde los organistes Konstantin Reymaier y Ernst Wally tocaron pieces clásiques, ensin acompañamientu de voces.