Portada Conceyos Avientu va ser más lliterariu que nunca con ‘Asturies, Cultura en Rede’

Avientu va ser más lliterariu que nunca con ‘Asturies, Cultura en Rede’

by redacción asturnews

El circuitu de lliteratura de Asturies, Cultura en Rede intensifica la so actividá’l mes d’avientu con propuestes per tol Principáu que tienen a la lliteratura como referente y que ya entamaron esta fin de selmana.

Esta selmana hubo cuentacuentos Bambalinas y bambaleos de Teatro del Cuervo en Tapia’l día 8 y narración oral y títeres en ¡A medies! de Tres la Puerta Títeres en L.lena el día 9. Movusic amosaron la maxa de los llibros en Érase una vegada… una ilusión el 10 d’avientu en L.lena, amás d’en Cangas onde van facelo’l día 27, en Colunga’l 28 y en Grau’l 29 d’esti mes.

En Grau VA de Verde Azul va narrar cuentos populares de la tradición oral en Vuela cuentu’l 12 d’avientu y Asturlibros Gloobal va impartir el taller d’ilustración infantil Pint-Al día 14. El 16 d’avientu Teatru Plus va tar Amasando personaxes en Candamo, Mar Coloráu Teatru va cuntar Cuentos, pates, picos y pezuñes en L.lena, David Acera va llevar La hora del globu en Navia y va haber Cuentos de Navidá de Elisabet Martín Teatru en Ribesella, una propuesta de narración oral que’l públicu de San Martín d’Ozcos va poder esfrutar el día 22 y el de Candamo, el día 23.

VA de Verde Azul tamién va tar con Cómo me convertí en verde’l día 20 en La Ribera, Gloria Sagasti colos sos Cuentos zarraos el día 20 en Llanera y David Acera con Cuentos de colores pa díes en blancu y negru el día 20 en Navia y el 29 d’avientu en L.lena. Les hestories llenes de maxa y fantasía de La Sorrisa del Llagartu van llegar el 21 d’avientu a Cangas; los Cuentos de Birlibirloque de Yheppa Títeres, el día 26 a Tinéu; y el 29 d’avientu, La vuelta al mundu n’ochenta díes de Fantastique Company a Colunga y Puppys, a Coaña.

La programación d’anguaño va rematar el día 30 con De bruxes y otros cuentos de Gloria Sagasti en Nava y Cartes a Lorca de Lluz de Gas Teatru en Gozón.

Nesti últimu semestre programáronse 99 eventos de 36 profesionales en 32 conceyos, con un presupuestu cimeru a los 59.000 euros. Los circuitos de Asturies, Cultura en Rede son un proyectu dela Conseyería de Cultura, Política Llingüística y Turismu, realizáu en collaboración colos conceyos asturianu y xestionao pola Sociedá Pública de Xestión y Promoción Turística y Cultural del Principáu d’Asturies. Amás del circuitu de lliteratura, hai circuitos temáticos de cultura tradicional, Xacobéu, artes escéniques, música, artes visuales, Autores Nel Camín y Cuadonga 2022 – Camín de los santuarios.

Tamién te podria gustar