Portada Conceyos Los conciertos enllenen esti mes de música con ‘Asturies, Cultura en Rede’

Los conciertos enllenen esti mes de música con ‘Asturies, Cultura en Rede’

by redacción asturnews

El circuitu de música de Asturies, Cultura en Rede ufierta 15 conciertos pa tolos gustos en tol territoriu asturianu esti mes d’avientu. Dellos ya se celebraron nos primeros díes del mes, pero la mayoría van ser nesta próxima quincena.

El grupu de música Alcuerdo, en formatu cuartetu de cuerda y soprano, tuvo’l 5 d’avientu en Cangas; Forma Antiqva y la so Sonatine Private el día 8 en Cangas; y B´Rocko Project, col so programa de música clásica Les pequenes sinfoníes, el 9 d’avientu en Ribedeva. El día 10 Thash-Tornaos llevó a Villaviciosa’l so espectáculu AcartOOnados, nel que combina soníos del swing, jazz y rock and roll con dibuxos animaos.

El 17 d’avientu va haber conciertos de Celso Díaz Band en Siero y de Berto Banielles & Asturiana Mining Company en Salas y el día 23 el pianista César Latorre va poner música a películes mudes en Gozón y Algaire va tocar en Grau.

El soníu del órganu y del saxofón van xunir en Nova et Vetera de l’Asociación Música Nostra el día 26 en Sotu’l Barcu; Alicia Álvarez va interpretar Cantares pa neñes y neños del so álbum Kikirikikí el 28 d’avientu en Llaviana; Cristina Montull Tríu va actuar en Llanes el día 29 y Bon Sucesu va poner el broche d’oru a la programación del circuitu de música’l 30 d’avientu en Navia.

Nel últimu semestre del añu nel marcu d’esti circuitu programáronse 78 conciertos de 36 profesionales y empreses en 36 conceyos, con un presupuestu cimeru a los 185.000 euros.

Los circuitos de Asturies, Cultura en Rede son un proyectu de la Conseyería de Cultura, Política Llingüística y Turismu, realizáu en collaboración colos conceyos asturianu y xestionao pola Sociedá Pública de Xestión y Promoción Turística y Cultural del Principáu d’Asturies. Amás del circuitu de música, hai circuitos temáticos de cultura tradicional, Xacobéu, artes escéniques, artes visuales, Autores Nel Camín, lliteratura y Cuadonga 2022 – Camín de los santuarios.

Tamién te podria gustar