Telon de Fondo lleva “El xuegu de Yalta” a Cangas

El Teatru Toreno de Cangas del Narcea va acoyer esti sábadu, 7 d’agostu, de magar les ocho la tarde, la representación de la obra “El xuegu de Yalta”, per parte del grupu Telón de Fondo. “El xuegu de Yalta” ye obra de Brian Friel, al traviés de l’adaptación del cuentu de Chéjov “La dama del perrín” y cuenta una de les mas guapes hestories d’amor, escrita pol autor rusu y adaptada por dramaturgu irlandés Brian Friel, con torna agora de Lluis Antón González, que xunto a Marilú Casas protagoniza la obra.

Na obra, Dmitry Gurov y Ana Sergueyevna tán de vacaciones en Yalta, ciudá de veranéu de la Rusia zarista, y lo qu’escomienza como un xuegu, acaba atrapándolos nuna hestoria d’amor adúlteru, a la que nun alcuentren la salida.

La escenografía y les lluces son de Beni García, hestóricu director del grupu avilesín Candilejas y la producción ye de Xulio Vigil, ún de los fundadores de Telón de Fondo nel añu 1973.