Suiza va acoyer esti añu los actos del Día de les Lletres Asturianes nel Esterior

Como cada añu dende 2001, un Centru Asturianu acueye los actos d’esta celebración. Nesta ocasión, los eventos van compartise ente los llares de los asturianos nes ciudaes suices de Lausanne y Berna. La decisión tomóse ayeri na Conseyería de Cultura, onde aconceyaron el Presidente del Conseyu de Comunidaes Asturianes, Manuel Fernández de la Cera, la Directora Xeneral de Política Llingüística, Consuelo Vega Díaz y Pablo Xuan Manzano, representante de l’Academia de la Llingua Asturiana.

El Conseyu Asturianu de Comunidaes Asturianes celebra esti Día de les Lletres nel Esterior dende 2001, y los actos pasaron yá pelos centros asturianos de Les Palmes, Logroño, Madrid, Montevidéu, Bonos Aires, París, Liexa y Chile, na última edición.

Les actividaes van tener llugar el 23 y 24 de mayu teniendo por tema central la poesía asturiana d’anguaño, como na cabera edición. El críticu y profesor titular de Lliteratura de la Universidá d’Uviéu, José Luis García Martín, va dar una conferencia y va preparar la esbilla de testos de poetes asturianos, que va asoleyase n’edición trillingüe (asturianu, francés y alemán) pa la ocasión.

Amás, la Conseyería va llevar a dambos centros la esposición “Miraes: Un añu d’Asturies en semeyes. IV esposición de l’Asociación Profesional de Fotoperiodistes Asturianos”.