El Conceyu de Ribeseya entama un concursu de conocimientos sobre Asturies

El concursu lleva por nome “Caleyando per Asturies”, y ye según los sos responsables “el típicu concurso d’entrugues y respuestes nel que dellos equipos van competir nuna lliga hasta la gran final”. La edá mínima pa participar nos equipos, qu’han represantar un pueblu o barriu, un cursu, una clas o un centru educativu, una asociación o un simple grupu d’amigos, son los 16 años.

Caún ha contestar 14 entrugues sobre Asturies, dende Xeografía y Hestoria, a Llingua y Lliteratura, pasando per Arte, Flora y Fauna, conceyu de Ribeseya, Gastronomía, Folclore y Deportes, amás de temes d’actualidá apaecíos nos medios de comunicación.

Les entrugues van facese n’asturianu, anque va cuntase con traducción simultánea. Caún de los componentes del equipu ganador van facese con una fin de selmana nuna Casa Rural de Somiedu.