Somos Avilés denuncia los puestos ‘a deu’ de la Corporación

Somos Avilés vieno acabante denunciar los puestos ‘a deu’ de la Corporación, depués de que l’equipu de gobiernu nomara a un miembru de la dirección local del PSOE pa un puestu de trabayu que tendría de cubrise por concursu.El gobiernu local va aprovir el puestu de trabayu de Xefe de Sección d’Educación por aciu una comisión de servicios nomando a José Ramón Núñez Santos pa un puestu, que según Somos Avilés “foi creáu nel cambéu de la RPT del plenu del 3 de Julio pero con una forma de provisión de Concursu abiertu a funcionarios y funcionaries de cualquier alministración”.

Dempués d’esti alcuerdu plenariu, el gobiernu local “nun da nengún pasu pa la provisión convocando’l concursu y tres dos meses d’inactividá procede al nomamientu alegando urxente y inaplazable necesidá cuidao que el cursu empieza’l 1 de setiembre” según Somos Avilés. Y, amás, nel resolvimientu de nomamientu “xustifiquen la elección del citáu funcionariu en que pola so cualificación y el trabayu desempeñáu hasta la fecha, ta especialmente capacitáu pa desenvolver estos llabores”.

En Somos Avilés consideren esti nomamientu como irregular y faltu d’ética: “La persona escoyida forma parte de la Executiva Local de PSOE d’Avilés como Secretariu d’Educación y foi candidatu nes últimes elecciones locales nel puestu décimu octavu. La xustificación de la urxencia pal nomamientu créase primeramente al nun dar los pasos pa la so provisión por aciu concursu. Hai una intencionalidad n’allegar de manera indirecta a la llibre designación y asitiar nel puestu a una persona que cumple los requisitos de ser funcionariu de clasificación A2, pero que’l so currículum oxetivu conocíu ye del de ser miembru de la dirección local del PSOE. La comisión ye pa un añu, prorrogable pa otru si’l gobiernu local sigue ensin aprovilo pol procedimientu aprobáu en plenu”.