Radiotelevisión pública asturiana sí, pero n’asturianu

Los retayos anunciaos pol Gobiernu d’Asturies sobre’l presupuestu de la radiotelevisión pública asturiana tán atopando la respuesta de los trabayadores de la canal y tamién de dellos colectivos que recuperen la hestórica reclamación d’una radio y televisión pública 100% n’asturianu. L’Asociación N’Ast manifestó que “si bien el nacionalismu asturianu siempres reivindicó y esixó la creación d’un ente públicu de radiotelevisión asturiana, la RTPA entamada y xestionada pol réxime arecista del PSOE yera tolo contrario de lo que precisaba la sociedá asturiana”. Amás, otres iniciatives particulares tán atopando’l sofitu de los internautes, como la páxina “Pol futuru del sector audiovisual n’asturianu”, en Facebook.

N’Ast defende “una reestructuración radical de la RTPA tanto na so programación como na so xestión”, yá que consideren imprescindible una RTPA que recueya la cultura asturiana “como un valor social de proyeición universal y non como una reliquia folclórica, qu’asuma la llingua asturiana como una ferramienta de comunicación tresversal a toles temátiques, qu’esprese la pluralidá social esistente nel País, y que se caracterice pola austeridá y la profesionalidá”.

Pa ello N’ast reclama “una RTPA que funcione dientro d’estos esquemes a diferencia de l’actual si que tendría una xustificación social como un ente al serviciu de la ciudadanía, pues realmente Asturies precisa una RTPA qu’esprese la so realidá acullá del modelu arecista de radiotelevisión”.

El Partíu Asturianista foi la primer fuercia política que dende los años noventa vieno reclamando una televisión autonómica qu’emitiera n’asturianu, cola negativa de los partíos mayoritarios n’Asturies. Nun foi hasta la llegada a la presidencia d’Asturies de Vicente Álvarez Areces cuando se punxo en marcha la creación d’esti ente, que cuntó col refugu del PP nun entamu, pero darréu col total alcuerdu de les dos fuercies. Dende entós la presencia del asturianu na mesma foi mínimu, con programes venceyaos a les tradiciones y la cultura nun porcentaxe mínimu de la programación, y nunca en doblaxe de películes, informativos o otros conteníos consideraos prioritarios pa la normalización d’una llingua minorizada.

Campaña en Facebook por una RTPA n’asturianu