Nueva llínea de subvenciones pa persones ensin emplegu n’Avilés

Los emprendedores van recibir un máximu de mil euros per persona y el presupuestu total de la convocatoria ye de 60.000. El plazu pa presentar solicitúes remata’l 13 de noviembre.

El Conceyu d’Avilés convoca una nueva llínea de subvenciones empobinaes a persones físiques qu’empecipien una actividá empresarial o profesional por cuenta propia nel términu municipal nun establecimientu comercial o d’hostelería abiertu al públicu y que tuvieren en situación de desemplegu antes d’empecipiar l’actividá. La convocatoria tien una cuantía de 60.000 euros.

La subvención tien la finalidá de sofitar a les persones desemplegaes qu’empecipien una actividá por cuenta propia, concretamente aquelles actividaes que suponen l’usu d’un local comercial allugáu a cuerpu de cai y abiertu al públicu, contribuyendo a la dinamización de la redolada urbana del conceyu.

Establezse una ayuda única por un importe máximu de 1000 euros pa cada persona física. Esta cuantía va deber de ser destinada a sufragar gastos derivaos del entamu de l’actividá como son el pagu del arriendu del local comercial, según los certificaos de seguridá correspondientes o otros similares qu’haya que llograr pola naturaleza de l’actividá, seguros del local comercial nel que se realiza l’actividá o de responsabilidá civil, alta en suministros imprescindibles pal entamu de l’actividá y les sos primeres factures como’l suministru eléctricu, combustible y servicios de telecomunicaciones (telefonía, Internet ) y la compra de les mercaderías y esistencies necesaries pal desenvolvimientu de l’actividá. Nun van ser subvencionables les inversiones realizaes n’activos fixos o na reforma del local.

L’establecimientu comercial nel que s’exerze l’actividá ha permanecer abiertu al públicu un períodu mínimu d’un añu, nun siendo subvencionables les actividaes desenvueltes por sociedaes mercantiles o d’economía social. El plazu pa presentar solicitúes remata’l día 13 de noviembre de 2015.

Les persones comenenciudes pueden llograr más información na Sección de Promoción Empresarial del Conceyu d’Avilés, allugada nel Centru d’Empreses la Curtidora (985 129 767 empresasayto-aviles.es)