Convocáu’l VI Premiu María Elvira Muñiz

Dende’l 30 d’ochobre y hasta el próximu 30 de payares abre’l plazu de presentación de candidatures pal VI Premiu María Elvira Muñiz de Promoción de la Llectura.

Nel marcu del pactu ciudadanu Xixón pola Llectura, que representa a tolos axentes que trabayen nel conceyu de Xixón a favor del llibru y la llectura, alcordóse convocar unos premios que sirvieren d’estímulu a les iniciatives más destacables dientro d’esti ámbitu fundamental de la cultura.

Foi tamién por alcuerdu unánime del Conseyu Asesor de Xixón pola Llectura que los premios lleven el nome de la profesora María Elvira Muñiz Martín, en reconocencia a la exemplar trayectoria profesional y a les cualidaes humanes d’esta estudiosa y catedrática de lliteratura, qu’arimó a munches xeneraciones d’alumnos xixoneses el so amor polos llibros y la so pasión pola llectura.

Los premios convóquense añalmente so la denominación Premio María Elvira Muñiz de promoción de la llectura y tienen en 2015 dos modalidaes:

Modalidá A. Reconocencia a una persona, entidá o empresa por tola so trayectoria (creativa, investigadora, divulgadora, educadora…) o por iniciatives especialmente destacaes a favor del llibru y la llectura.
Modalidá B. Premiu pa una iniciativa singular desenvuelta per un centru educativu del conceyu de Xixón en favor de la llectura.

La dotación del premiu establezse en:

Modalidá A: 1.000 euros
Modalidad B: Llote bibliográficu por valor de 1.000 euros.

La concurrencia a los premios va poder realizase a pidimientu de los mesmos interesaos o a propuesta de cualquier persona, a títulu individual o en representación d’instituciones o colectivos. Sía que non tendrá d’apurrise una memoria xustificativa de los méritos que s’alieguen pa optar al premiu.

Les propuestes van presentase nel rexistru de la Fundación Municipal de Cultura, Educación y Universidá Popular (Centru de Cultura Antiguu Institutu. C/Xovellanos, 21. 33201 Xixón/Xixón).

El Xuráu va tar compuestu por persones representatives del campu del llibru y la llectura, designaes pola Fundación Municipal de Cultura, Educación y Universidá Popular del Conceyu de Xixón/Xixón.