Miguel Ángel Puente Cabrero ye’l ganador del VI Concursu de Semeyes de La Sidra

Esti xueves pasáu aconceyó’l xuráu del VI Concursu de Semeyes de La Sidra nel Llagar El Mancu, en Xixón, y n’actu abiertu al públicu, escoyendo les venti semeyes que formarán parte de la esposición LA SIDRA ‘13 y dando anuncia de los ganadores de los premios. El 1er premiu dotáu con 500 euros en metálico y 100 euros en llibros foi pa la semeya “Cartel”, de Miguel Ángel Puente Cabrero; el segundu, dotáu con 350 euros, pa “Primer Mosto” de Carlos de Cos Azcona, y el tercer llugar, con 150 euros en premios, pa la semeya “Inmersión”, d’Óscar Chamorro Flórez.

Amás, el Premiu Especial J.R., dotáu con dos caxes de sidra d’esti llagar, pa la obra protagonizada por esta sidra, foi pa la semeya “Escanciado”, d’Óscar Chamorro Flórez.

A esta sesta edición del concursu presentárense 134 fotógrafos con 593 semeyes, de 18 naciones estremaes, “afitando entá más el so calter internacional”, espliquen dende la organización, que tamién destacó “la participación por primer vegada dende Australia, anque ciertamente la participación mayoritaria correspuende a Asturies, Madrid y el País Vascu”, aclarien.

Esti concursu de semeyes de temática sidrera ta entamáu pola revista LA SIDRA, cuntando col sofitu del Llagar Sidra J.R. Les venti semeyes escoyíes formarán parte de la esposición añal que fai LA SIDRA y que se inaugurará próximamente na Sidrería La Galana de Xixón, coincidiendo col actu d’entrega premios.