Más d’ocho hores de música n’alcordanza d’Ígor Medio y Carlos Redondo

El vienres pela tarde abriéronse los dos escenarios preparaos na Playa Poniente de Xixón y a lo llargo d’unes d’ocho hores xubieron más de 150 músicos. Los escenarios llevaben los nomes d’Ígor y Carlos, músicos del grupu Felpeyu que morrieron va agora un añu nun accidente de tráficu que sufrió’l grupu cuando viaxaba p’hacia Cataluña.

El conciertu organízalu l’asociación ‘N’alcordanza’ y va entamar a les 6 de la tarde. El conciertu va cuntar con música pop, rock y folk, con un repás especial pelos temes de ‘Los Locos’ y ‘Felpeyu’, a los que pertenecíen Carlos ya Ígor. Dalgunos grupos que lleven años ensin xuntase nun quixeron perder la oportunidá d’axuntar pa recordar la figura de los dos músicos.

L’escenariu ‘Ígor’ va cuntar coles actuaciones de folk, con grupos como Gatos del Fornu, La Bandina’l Tombo, Tejedor, N’arba, Llan De Cubel, Corquieu y Felpeyu, amás d’una actuación de lo que nomen ‘Felpeyu’s Old Stars’, colos antiguos miembros que pasaron pel grupu, los hermanos Cástor y Felix Castro, Elías García, Isidro Suárez, Toño Gómez, Xel Pereda, Dudu Puente y Ruma Barbero.

Van participar tamien nel escenariu folk Toli Morilla, Xurde Fernández, Ruben Bada, Flavio Rodríguez, Antón Barquero, Ramón Prada, Chus Pedro, Fonsu Fernández, Edi Word, Lorena García, Indalecio Santos, Pedro Pangua y Manolo Durán. Per otru llau, nel escenariu ‘Carlos’, espaciu rockeru, van tocar Los Huracanes de Montiana, Lucas y Los Patosos, Mamy Carter, Holiday Fleet, Edwin Moses y la formación Los Manguanes. El conciertu rock van rematalu los músicos de Los Locos tocando los temes de la banda.