Manifestantes del PP y de Batasuna boicoteen la sede de Paloma Sainz en Second Life

La candidata socialista a l’alcaldía d’Uviéu vio esti martes como manifestantes de dereches y de Batasuna (caún colos sos mensaxes) boicoteaben la so sede en Second Life al estilu de lo que ta faciendo nel mundu real Batasuna nestos díes de campaña. Los manifestantes concentráronse delles hores con cartelos na sede que tien nel mundu virtual Second Life chateando los lemes qu davezu se vienen sintiendo nes manifestaciones de la AVT (Asociación de Víctimes del Terrorismu).

La sede tuvo nesta xornada’l mayor tráficu dende que s’allugare nel mundu virtual, pasando de los 12700 avatares a les 10 de la nueche.

Dellos de los manifestantes portaben cartelos pidiendo la llibertá de De Juana y dellos otros banderes d’España y cartelos pidiendo que tornare a la cárcel el terrorista y criticando la política terrorista de Zapatero.

Asturnews ye’l primer mediu dixital en facese ecu d’una manifestación que sigue los pasos de les que los socialistes franceses ficieron tamién en Second Life escontra Le Pen nes pasaes eleiciones a la presidencia de la República de Francia.

Ente los manifestantes, dellos aportaron con armes de fueu y con antorches a la sede de Paloma Sainz y del PSOE d’Uviéu en SL, magar tea dafechamente prohibido na zona onde s’alluga conocía como Quest II, talamente como se pue ver nel cartelu afitáu delantre la sede polos propietarios del tarrén onde mercare la so sede la candidata uvieina.

A la hora que s’espubliza esta noticia, les nueve de la nueche del martes 15 de mayu, entá siguen manifestándose un bon garapiellu de persones na sede que tien nel mundu virtual Second Life.
SLURL de la sede electoral de Paloma Sainz en SL