Los profesionales de la cultura esixen la llei del estatutu del artista

Una llei que recueya les especificidaes del colectivu d’artistes, la so intermitencia nel trabayu, con un cambéu de la prestación por desempléu, y una nueva fiscalidá ye lo qu’esixen los profesionales de la cultura.

Les esixencies apaecen nun estatutu que yá foi presentáu a los partíos políticos, dende’l Partíu Popular hasta Podemos, y que, según la Unión d’Actores y Actrices, comprometiéronse a incluyilo nos sos programes electorales.

Con un 80% de paru nel oficiu y un IVA cultural del 21% que ta afogando a munches empreses del sector, el colectivu de profesionales de la cultura quier aprovechar los cambeos políticos que s’averen n’España, tres les elecciones del 20 d’avientu, pa llanzar una voz d’alarma sobre la so precaria situación. La noticia diola esta selmana la directora Magüi Mira, nel cursu d’un alcuentru que convocó en Madrid, na see de l’Academia de Cine, a numberosos trabayadores d’esta industria, como’l cantante Raphael, los actores Alba Flores, Carlos Hipólito, Roberto Enríquez, Manuel Galiana y Víctor Clavijo y la realizadora Gracia Querejeta, ente otros.

Esti estatutu del artista propón un cambéu nel cambéu na prestación por desempléu y un modelu flexible que garantice los derechos d’esti sector y de los trabayadores nel réxime d’intermitencia al que tán sometíos. Esta intermitencia –como exemplu, los artistes solo tán daos d’alta na Seguridá Social de xueves a domingu nel casu de les obres de teatru que se representen esos díes o demientres les xornaes de rodaxe de les series- afecta sobremanera a les actrices que se plantegen la maternidá y que ven como nun tienen los mesmos derechos que’l restu de trabayadores con emplegu.

Otru de los puntos clave d’esti estatutu ye la esixencia de cambeos na fiscalidá de los afectaos por esi réxime d’intermitencia, qu’entrepola periodos de trabayu y de non trabayu de manera permanente. Al nun tener la mesma perspectiva d’emplegu y de futuru que’l restu de el trabayadores de réxime xeneral, piden una graduación nel pagu de los impuestos tocantes a la tributación, de tal manera que’l primer añu páguese’l 60% de los impuestos, un 30% el segundu añu y el 10% restante’l tercer añu.

El cómputu de les hores de preparación y formación como tiempu trabayáu y el sofitu a los actores yá xubilaos inclúyense tamién nesti estatutu que pide’l colectivu d’artistes, qu’arrexunta, según los sos propios datos llograos del Ministeriu d’Educación, Cultura y Deporte, a 54.700 trabayadores y a otros 190.900 técnicos.