Llamazares considera que Fernández configura un gobiernu de baxu perfil y espera que lo de Cultura nun seya sólo un xestu

Gaspar Llamazares, voceru parlamentariu d’IX na Xunta Xeneral, saluda los cambeos producíos nel Gobiernu, anque considera que se trata de “la configuración d’un gobiernu de baxu perfil y ensin llideralgu frente a los retos social y económicu qu’encara Asturies nesta llexislatura, ensin escaecer que se trata d’un gobiernu en minoría que reafita a IX na so orientación sobre la necesidá d’un gobiernu plural y de cambéu”. IX valora’l nomamientu d’un independiente, amás de miembru de l’Academia de la Llingua, y espera “qu’esti sía’l primer pasu pal desbloquéu de la situación de la llingua y l’apertura del alderique sobre la cooficialidá. Esperamos que non solo sía un xestu al mandu de la conseyería d’Educación”.

Pero aparte del nomamientu en Cultura lo demás ye más de lo mesmo pa Izquierda Xunida: ” Javier Fernández quedase nun cambéu a mediu camín” y “brese una puerta al respective de les midíes de rescate social, que son les que más nos importa, pero cierra una puerta, con una portada, en relación al medioambiente”.

voceru d’IX llamenta tamién que les variaciones nel executivu nun incluyeren, sobremanera, a la conseyería d’Infraestructures, Ordenación del Territoriu y Mediu Ambiente, dirixida por Belén Fernández, y a la conseyera de Agroganadería. IX envalora que “quien xeneró un maltratu al medioambiente asturianu y foi incapaz de cumplir les directrices medioambientales dictaes dende la Xunta Xeneral, nun puede ser nestos momentos una solución pa realizar una xestión medioambientalmente comprometida”. Llamazares tamién sostien que’l mediu rural, el sector agroalimentariu y el forestal riquen nestos momentos d’un especial impulsu pa poer consolidaloz como sectores de futuru.