Les trés convocatories del 8 de setiembre coinciden nel analís “Asturies necesita un cambiu”

Los actos del Día de la Nación Asturiana celebraos polos partíos nacionalistes amosaron la esistencia d’un discursu común, yá qu’en tolos actos coincidióse na necesidá de cambiar la situación políticia d’Asturies. Trés convocatories, la de Xixon, Candás y Uviéu, con alredor de doscientes persones caúna, nes qu’otru de los temes trataos foi la necesidá d’un xuntanza política ente los nacionalistes asturianos. Asturnews ufre semeyes de toles convocatories.

Bloque por Asturies y UNA caminen p’hacia’l pautu electoral

En Xixón l’actu entamó con media hora de retrasu nos Xardinos del Nautico. Participaron nel actu l’actor asturianu Toño Caamaño y representantes de dellos colectivos asturianos, como Javier Orozco, refuxáu políticu colombianu. Sicasí, la presencia más llamativa foi la del ex-conseyeru Javier García Valledor a la Plaza del Náutico, que según persones presentes nel actu “acaparó tola atención de los medios”. El tovía militante d’Izquierda Xunida declaró sentise “más cercanu al mensaxe d’esta convocatoria qu’al de la dirección d’IX”.

Nel actu participaron dos representantes d’Andecha Astur y miembros d’otres formación, como FAI, que reclamó con folletos “que se celebre’l Día de la Nación Asturiana’l 25 de mayu”.

Amás del Bloque por Asturies , UNA y Andecha Astur, tuvieron nel actu les formaciones llocales UICA, Asturianistes por Nava, Más Corvera y S.XXI de Muros del Nalón, los sindicatos CSI y SUATEA y los colectivos Fai! y Entemecer. A la fin del actu diose llectura del manifiestu consensuáu poles fuercies presentes.

Unión Asturianista (URAS-PAS) celebró’l Día de la Nación en Candás

Unión Asturianista, coalición formada pol PAS y la URAS, celebró en Candás el Día de la Nación Asturiana. Dende primer hora de la mañana una carpa del PAS instalada nel centru de la villa candasina sirvió de llugar pa dar a conocer el mensaxe y les propuestes de la coalición, dientro de la campaña “Y tu, ¿qué opines?”. Nos actos participaron más de doscientes persones, según la formación.

A la una y media la tarde entamó l’actu políticu cola intervención del representante llocal d’Unión Asturianista en Carreño. Darréu intervino Javier López, presidente d’Unión Renovadora Asturiana, que recordó que “los problemes xenerales afonden más n’Asturies pola mor de la mala xestión de los partíos centralistes”.

Xuan Xosé Sánchez Vicente, presidente del Partíu Asturianista, peslló les intervenciones del Día de la Nación con un discursu nel que recordó la llarga hestoria de la nación asturiana “única, xunto a Cantabria, con un nome diferenciáu cuando aportaron a la Península los romanos”. Sánchez Vicente recordó les ansies d’Unión Asturianista “pol progresu d’Asturies”, que nun se da, recordaron “pol mal facer del PSOE y el pasotismu del PP, que desprecien a Asturies y tán a ver que-yos manden facer dende Madrid”.

Les cais de Candás enllenáronse dempués de banderes del PAS y la URAS, percorriendo les cais hasta’l monumentu a la mar y a la mina, onde se fizo un homenaxe a los trabayadores asturianos “nun momentu de crisis tan dura como esta”. Nun llocal del conceyu celebróse dempués una xinta de xermandía na que, amás de los militantes de dambes formaciones, tuvieron presentes miembros de Xuventú Asturianista y Mariu Arbesú, Secretariu d’Organización d’Andecha Astur, en representación del so partíu.

Andecha Astur y otres formaciones pidieron “democracia p’Asturies”

N’Uviéu, a la una y media, entamó la manifestación del Día de la Nación Asturiana del colectivu “Democracia p’Asturies”, onde participen Andecha Astur, Darréu y la CSI, ente otres formaciones. Percorriéronse les cais de la capital asturiana, dende la Estación del Norte hasta delantre de Presidencia del Gobiernu d’Asturies, rematando l’actu la vocera de la plataforma ciudadana “Democracia p’Asturies” pa darréu dar pasu a les intervenciones de voceros de les organizaciones presentes.

Semeyes de los actos

Semeyes del actu de la Plataforma unitaria 8-S, en Xixón

Semeyes del actu de Democracy for Asturies n’Uviéu

Actu d’Unión Asturianista (URAS-PAS) en Candás