Moscones en Xixón convoquen un concursu periodísticu sobre Grau

L’asociación de Moscones en Xixón asoleyó les bases de la edición quinta del so concursu pa trabayos periodísticos, nel que se pue participar con artículos, reportaxes, entrevistes, cróniques o cartes, escritos en castellán o n’asturianu. La obra ha tar asoleyada en dalgún mediu del estáu español ente l’1 de xineru y el 31 d’avientu de 2010. Como escepción, tamién pueden optar premiu los trabayos que nun ten publicaos, y nesi casu, Moscones en Xixón encargaríase d’asoleyalu. L’únicu requisitu en relación al tema, ye que contribuya a esparder y resaltar los valores culturales, cívicos y éticos del conceyu de Grau.

El premiu va a ser de 1.200 euros, pero podrá declarase ermu. Los trabayos han presentase per triplicao nel llar de l’asociación que ta na cai Ezcurdia de Xixón. Han llevar certificáu de la empresa que lo publicare si l’artículu ta ensin firmar o firmaú con nomatu, y si ye posible, acompañar la documentación d’un curriculum. El fallu va asoleyase enantes del mes de marzu. Pueden vese les bases completes na páxina web del Ayntamientu de Grau, que tamién collabora nel concursu.