La Universidá convoca cursos d’asturianu en Xixón y Uviéu

Per segundu añu consecutivu la Universidá d’Uviéu, al traviés de la Casa de les Llingües, convoca dos cursos d’asturianu, en Xixón y Uviéu. Estos cursos, de nivel A1 d’asturianu cunten con venti places y tienen un preciu de 330 euros. N’Uviéu los cursos van celebrase los llunes y miércoles, de 17:30 a 19:00 hores; y en Xixón, dientro de la Cátedra Xovellanos, los martes y xueves, de 19:30 a 21:00 hores. Toos ellos van entamar na selmana del 1 d’ochobre, rematando’l 31 de mayu de 2013 y cuntando con 90 hores de docencia. La matricula tará abierta del 2 de xunetu al 10 de setiembre.

Esta foi una de les promeses que se ficieren nel momentu de crear la Casa de les Llingües de la Universidá d’Uviéu, en 2008, cola llegada del rector Vicente Gotor al gobiernu universitariu. Pero nun foi hasta 2011, y dempués de delles protestes del Conceyu Universitariu pol Asturianu, cuando la nueva institución convocó cursos d’asturianu dientro de la so ufierta.

Información de los cursos na páxina de la Universidá d’Uviéu