Avilés dedica’l so XIX Foru Solidariu a la enerxía non contaminante

Avilés celebra la XIX edición del so Foru Solidariu, impulsáu pol Conseyu Municipal de Cooperación y Solidaridá y el Conceyu. Sol lema “La enerxía anuévase. Y tu, ¿te atreves tamién?”, ta dedicáu al séptimu Oxetivu de Desenvolvimientu Sostenible (ODS) de l’Axenda 2030 de Naciones Xuníes: “Enerxía algamadiza y non contaminante”. Basáu en “garantizar l’accesu a una enerxía algamadiza, fiables, sostenible y moderna para toos”.

Va desenvolvese dende’l próximu llunes, 7 de payares, hasta’l miércoles 9, con sedes nel IES Carreño Miranda, el Palaciu de Valdecarzana, la Casa de Cultura y la Plaza d’España.

Foi presentáu esta selmana por Jorge Luis Suárez, conceyala de Participación Ciudadana y Cooperación Internacional d’Avilés, acompañáu de representantes de les entidaes que collaboren na organización:

Ana Andrés, presidenta de la Coordinadora de ONGD del Principáu (CODOPA)
Lucía Nosti, de Médicus Mundi y vocal de CODOPA
Inés Aparicio, comunicación de CODOPA
Náyade Lamadrid, coordinadora d’actividaes de CODOPA
Berta López Carbayeda, presidenta de Cruz Roja d’Avilés
Ángela García Agüeria, responsable de l’Asamblea Local d’Avilés de Cruz Roja
María Jesús Rodrigo, de la Fundación El Páxaru Azul
Francisco M. Fernández Yebra, de Movimientu Asturianu pola Paz

Tamién collaboraron nesta edición l’Asamblea de Cooperación pola Paz, Amnistía Internacional, Cáritas de Llaranes, Fundación Nueves y Desenvolvimientu, Manos Xuníes, Movimientu Asturianu pola Paz, Paz y Amistá, Paz y Solidaridá, Pueblu y Dignidá, y Soldepaz Pachakuti.

El programa inclúi conferencies  sobro crisis enerxética como la de Yayo  Herrero López, o intervenciones sobro electrificación fotovoltaica en Guinea como les de Jorge Coque Martínez y Pablo Revuelta Sainz, de la ONG Inxenieros ensin Fronteres.

Toles conferencies van ser retresmitíes en directu al traviés de la canal de YouTube del Conceyu d’Avilés: www.youtube.com/AyuntamientoAviles.

L’alcaldesa d’Avilés, Mariví Monteserín, va inaugurar de forma oficial el Foru Solidariu’l próximu llunes, nel salón d’actos del IES Carreño Miranda, a les 17.00 hores. Va Tar acompañada pola directora de l’Axencia Asturiana de Cooperación al Desenvolvimientu, Beatriz Coto, y pola presidenta de la Federación Asturiana de Conceyos, Cecilia Pérez.

Más información