La UE pon en marcha un concursu fotográficu pa fomentar la diversidá

“Rompiendo Estereotipos” ye’l nome del concursu fotográficu que la Unión Europea entamó con motivu de la campaña “Pola diversidá. Escontra la discriminación”, enxerta dientro del Añu Europeu de la Igualdá d’Oportunidaes. La competición va desendolcase ente l’1 de marzu y el 30 de Xunu de 2007 y ta empobinada a estudiantes de tola Unión Europea.

Los estudiantes que quieran participar tendrán que presentar una semeya o un collage de semeyes que promuevan la diversidá. Un xuráu internacional de fotógrafos, artistes xóvenes y espertos nos campos del diseñu y la comunicación van ser los encargaos d’escoyer al ganador según criterios de calidá e interes del tema escoyíu.

El ganador va recibir 3000 euros y la so universidá o escuela otros 3,000, demientres que los finalistes va ser premiaos con 2,000 euros y los terceros con 1,000. L’únicu requisitu impuestu dende la organización ye que’l premiu se gaste en daque rellacionáu colos estudios. Amás los 35 meyores trabayos van exhibise nuna esposición itinerante por Europa y van dir impresos nos artículos de promoción de la campaña europea “Pola diversidá. Escontra la discriminación”.

El certamen ta empobináu a estudiantes matriculaos en fotografía, arte y diseño d’una institución de los ventisiete estaos miembros de la UE. Los estudiantes han d’acreditar que tan matriculaos nuna institución d’educación superior. Cada estudiante pue participar nel concursu pola so propia cuenta o al travies de la Universidá y podrá presentar un másimu de tres semeyes.

La fecha llímite pa unviar los trabayos ye’l 30 de Xunu de 2007. Les bases de la competición y la información necesaria pa los participantes pue consultase na páxina web del concursu

“Rompiendo Estereotipos”