La Sociedá d’Autores descarta Asturies en favor de Santiago pa centralizar la so actividá nel noroeste

L’actividá de la Sociedá Xeneral d’Autores y Editores pa tol noroeste, incluyida Asturies, centralizaráse a partir de 2006 en Santiago de Compostela. La entidá construirá un gran edificiu na capital gallega, depués de descartar la so ubicación en el Principáu, nun procesu que, según el responsable de la Sociedá d’Autores n’Asturies, Javier Vidal, nun implicará el pieslle de la sé que la SXAE mantién n’Uviéu.

L’actividá nella, afirma Vidal, mantendráse “esactamente nos mesmos términos qu’agora”, ensin suponer amenorgamientu nengún del ritmu de funcionamientu o les prestaciones a los artistes asociaos, que según el responsable d’Autores n’Asturies tendrán nueves posibilidaes de promoción nel edificiu qu’abrirá les sos puertes en Compostela a mediaos de 2006.

Magar d’ello, la propia Sociedá Xeneral d’Autores espresa na so páxina web que la nueva instalación, con una programación permanente de música, teatru, danza y cine, tratará con especial procuru la promoción de nuevos creadores y dramaturgos gallegos.

El descarte del Principáu como llugar de la nueva sé pal noroeste depués de valorar allugamientos n’Asturies alternativos a Santiago obedez en parte, sostién Vidal, a la imposibilidá de llevantar grandes edificios -el de Galicia tendrá 3.200 metros cuadraos- en llugares prósimos ente sigo, lo qu’obliga a la SXAE a instalar namás seis infraestructures de grandes dimensiones en tol Estáu: Amás de Compostela, sedrán centru d’actividaes nes sos respectives zones les ciudaes de Bilbao, Barcelona, Valencia, Sevilla y Madrid.

El presidente de la Sociedá d’Autores, Eduardo Bautista, presentó ayeri en Santiago xunta’l propiu Vidal el proyectu del edificiu de la SXAE pal noroeste, una construcción que se llevantará nun solar céntricu que l’Ayuntamientu de Compostela cederá a Autores por un plazu de 60 años.

Web oficial de la Sociedá Xeneral d’Autores y Editores