La Pola L.lena cellebra esti fin de selmana’l les fiestes tradicionales de La Flor

Les fiestes de La Flor, cola quinta edición del tradicional mercáu de La Flor en La Pola L.lena como actu central, ufren pa esti fin de selmana un programa festivu qu’incluí les actuaciones de Dixebra, Verdasca, Skanda, Falanoncaduca y La Col.la Propinde. El programa pal sábadu, que culmina a les 22:00 hores colos conciertos citaos dientro de la nueche Astur, tamien contempla la cellebración de xuegos tradicionales (17:00), l’actuación del grupu de bai.le tradicional l.lenizu (17:30), el mercáu de ganáu y el d’artesanía nel que van participar más de 150 artesanos(dende les 11:00).

El domingu a les once la mañana va abrise otra vuelta’l mercáu d’artesanía, pa siguir a les cinco la tarde con xuegos tradicionales pa los guah.es y a les 18:00 coles actuaciones de La Bandina ´l Tombo y Tuenda. El grupu Spanta la Xente van ser los encargaos de pone-y el ramu a les fiestes nel apartáu musical con un conciertu previstu pa les 22:30 hores del domingu.

El llunes, el prau de la ermita de La Flor en Piedracea, va ser l’escenariu de la popular romería. A les diez de la mañana va salir la jira denden la Pola, a mediudía va tener llugar la misa y darreu la procesión n’honor de la Virxen de La Flor.