La Banda Gaites del Conxuntu Pelayo de Buenos Aires festeya’l so Décimu Aniversariu

Esti prósimu sábadu, 5 de xunetu a les 21 hores, el Conxuntu Pelayo del Centru Asturianu de Buenos Aires festeyará’l décimu aniversariu de la so banda gaites. Por esti motivu va facese un festival musical nel Salón Alejandro Casona del Llar Social del Centru Asturianu de Buenos Aires asitiáu na cai Solís, 475 de la Ciudá Autónoma de Buenos Aires, con entrada llibre y de baldre.

Interpretaránse pieces tradicionales asturianes y d’anguaño correspondientes al repertorio de la banda gaites.

Amás, va contase cola actuación d’otros músicos y bandes amigues: S A P A (South Amarican Piping Association: Banda Gaites y Dances Esoceses) y Sete Netos (grupu folk de música tradicional gallega y celta).

El Conciertu, como ya se dixere enrriba va tener llugar el sábadu 5 de xunetu a les 21 hores nel Centru Asturianu de Buenos Aires, allugáu na Cai Solís 475, de la Ciudá Autónoma de Buenos Aires.

Dende 1997

La Banda Gaites nació como acompañamientu del conxuntu de baille ante la perda del so primer gaiteru Don Luis Martino.

Nel añu 1997, por aciu d’un grupu mozos que recibíen clases de gaita con profesores llegaos d’Asturies, presentóse’l proyeutu de la creación de la Banda Gaites a Manolo del Campo, creador y director del Conxuntu Pelayo. Foi él el mayor impulsor d’esta idega, sofitando en tou momentu’l proyeutu.

L’esperáu debut prodúxose nel Festival Aniversariu de la Xesta de Cuadonga del Centru Asturianu de Buenos Aires de 1997. La so formación yera de seis gaiteros, una curdionista y un tamboriteru. Los temes interpretaos foron “Cruz de Mayu” y “Marcha Celta” con “Dime Xilguerín Parleru”. La presentación foi un ésitu, polo que tuvo qu’ampliase la formación. N’abril de 1998 ya se contaba con once integrantes.

El perfeicionamientu de la banda gaites foi llográu gracies a los cursos dictaos de mou frecuente por Flavio R. Benito nel Centru Asturianu de Buenos Aires. A lo llargo d’estos años tamién collaboraron impartiendo clases dos reconocíos gaiteros asturianos: Diego Pangua y Pedro Pangua.

Anguaño, la Banda Gaites del Conxuntu Pelayo cuenta con doce gaiteros, dos tamboriteros, un bombista y tres pandereteres.

La Banda Gaites del Conxuntu Pelayo de Manolo del Campo presentóse en delles actuaciones a lo llargo del nuestru país. Nos años 1999, 2003 y 2006 presentóse n’Asturies. Cabe destacar que nel añu 2003 participó nel I Festival Celta de Montevideo (Jacksonville, Uruguay).