La 44 Selmana de les Lletres entamó esta fin de selmana n’homenaxe a Bolado

La 44 Selmana de les Lletres Asturianes, que va celebrase hasta’l sábadu 6 de mayu, rinde homenaxe esti añu a la figura del poeta y críticu lliterariu Xosé Bolado, fallecíu en mayu del 2021. Esti miércoles de 10 a 12.00 hores  nel Teatru de la Llaboral va representase´l  musical escolar Historia d’un bosque, de Nacho Fonseca, cola participación de la Orquesta Sinfónica del Principáu d’Asturies (OSPA), el Grupu d’Animación Musical Escolar (GAME), la Escuela de danza Alazne Castaño y voces femenines de la Escuela de Música Divertimento y Siero Musical.

Xosé Bolado, académicu de la llingua asturiana y profesor, foi una figura central de la recuperación llingüística y lliteraria d’Asturies na Transición. La programación incluye la estrena del documental Na firida del cementu. Vida y obra de Xosé Bolado, dirixíu por Ana Lamela, y tamién la edición de dos llibros conmemorativos alredor de la contribución decisiva que la figura de Xosé Bolado supunxo pa la llingua y la lliteratura asturianes.

La primera de les publicaciones asoleyaes n’homenaxe del autor, Xosé Bolado. Fálame duce, recueye la semblanza que distintos amigos y personalidaes del mundu de la cultura tracen sobre l’autor uviedín, no personal y tamién na aportación que fizo como poeta, como militante sindical y políticu y na so dimensión de críticu y estudiosu de la llingua y de la lliteratura n’asturianu. La obra, coordinada por Marta Mori, edítala’l Gobiernu del Principáu d’Asturies con realización editorial de Trabe.

La segunda de les publicaciones que va ver la lluz coincidiendo cola celebración de la Selmana de les Lletres va ser Palabres blanques. Testos d’Historia y Crítica lliteraria (Esbilla), una compilación de los artículos publicaos por Bolado na so faceta de críticu lliterariu. Ye una edición preparada por Marta Mori y coeditada pol Principáu d’Asturies y Trea.

Amás, l’espectáculu poéticu musical Flores escontra’l desamparu fizo homenaxe a la obra de Xosé Bolado nel escenariu del Teatru de la Llaboral el llunes, 1 de mayu, y al otru día, nel Auditoriu As Quintas d’A Caridá, les autores n’eonaviegu tamién recordaron a Bolado nel recital poéticu Hailas cola participación de Conchita Álvarez Lebredo, María José Fraga, Marisa López-Diz y el dúu Mestura, que va encargase de poner la banda sonora al alcuentru.

Na nómina amplia de voces que van tomar parte nel tributu públicu a Xosé Bolado nun van faltar los y les poetes de les xeneraciones más moces de la lliteratura n’asturianu. El sábadu 6 de mayu van axuntase a partir del mediudía nel Muséu Nicanor Piñole de Xixón nel alcuentru Fueyes de color infinitu. El públicu va poder disfrutar de les reflexones y los poemes d’Aida Escudero, María Fernández Abril, Alejandro Fernández-Osorio, María García Díaz, Xaime Martínez y Pablo X. Suárez. El grupu Tierra y Eco va ser quien s’encargue de poner música en directo al alcuentru.