Javier Villa y la so esposición abrieron el Setiembre Mitolóxicu

El Setiembre Mitolóxicu al que la Conceyalía de Cultura de Samartín del Rei Aurelio, al traviés de la so Oficina de Normalización Llingüística dedica tou esti mes con estremaes actividaes abriose esta primer fin de selmana con una esposición del dibuxante Javier Villa.

La primera de les actividaes llevase a cabu coincidiendo cola Feria de Muestres y Espositores FEMEX que se celebra la fin de selmana nel Parque d’El Florán. Y dende’l vienres hasta’l domingu pue visitase la esposición “Mitos asturianos” del dibuxante llangreanu Javier Iván Villa Vilchez.

Nella puen vese dalgunos de los personaxes mitolóxicos asturianos más populares, dende’l trasgu al busgosu o la xana, ente otros munchos. La muestra ta acompañada por dellos testos onde s’espliquen les carauterístiques d’estos personaxes, y cuenta con xuegos destinaos a toles edaes pa que la xente se pueda acercar a esta temática d’un mou cenciellu y afayadizu.

Esta mesma esposición va poder visitase dempués a lo llargo de tol mes de setiembre na Casona del Bravial de Blimea, de llunes a vienres n’horariu de 9 a 13 h.

Javier Iván Villa Vilches(41 años) ye natural de La Felguera (Llangréu). Destaca dende bien mozu nel ámbitu del dibuxu. Yá estudiando nel Colexu La Salle llegó a diseñar l’escudu que tovía tien anguaño esti centru. Dempués treslladó esa afición a la so carrera profesional, estudiando delineación nel IES Cuenca del Nalón, anque nunca escaeció la so faceta artística, decantándose davezu por temes fantásticos y mitolóxicos.

Llegó a ser ganador de varios concursos, como’l de la undécima edición de los Premios Félix Rodríguez de la Fuente, algamando’l primer puestu a nivel rexonal y el segundu a nivel nacional. Tamién ganó en varies ocasiones el concursu de carteles del Descensu Folclóricu del Nalón, y anque güei la so trayeutoria foi per otros caminos, sigue compaxinando’l so trabayu cola so faceta artística, como demuestra esta esposición na que nos tresllada a un mundu fantásticu a traviés d’unos dibuxos nos que destaquen el so trazu modernu y el dominiu de la técnica a la hora de combinar los colores, les lluces y les solombres, consiguiendo dar movimientu a los personaxes y profundidá a los escenarios nos que apaecen