Javier Broto gana’l Concursu de Semeyes de La Sidra

Javier Broto Hernando ganó’l primer premiu del IV Concursu Semeyes La Sidra, cola so semeya “Criación”. El segundu y tercer premiu fueron pa Joaquín D. Palazón Tornero, y Mónica González Álvarez, por “Igartubeiti” y “Un culín de Sidra” respectivamente. El fallu del xuráu tuvo llugar nel Llagar El Mancu, nun actu abiertu al públicu nel que fueron esbillando les semeyes presentaes hasta dexar les venti que formarán parte de la esposición La Sidra 2011 y énte les qu’escoyeron les trés obres premiaes.

Nesti IV Concursu Semeyes “La Sidra”, qu’entama la recista La Sidra en collaboración col Llagar JR- Altu l’Infanzón, presentáronse más de 160 fotógrafos con ná menos que 744 semeyes, lo que representa un auténticu ésitu. Los premios tan dotaos con 600 € (500 € en metálicu y 100 € en llibros) pa la semeya ganaora. 350 € (300 € en metálicu y 50 € en llibros) pal segundu premiu, y 150 € (125 € en metálicu y 25 € en llibros) pal terceru.

La semeya ganaora “Criación”, ye obra del oscense Javier Broto Hernando, y nella’l xuráu destacó tanto la calidá fotográfica de la mesma, comu’l fondu conteníu conceptual. En cuantes al segundu premiu “Igartubeiti”, obra del murcianu Joaquín D. Palazón, el xuráu destacó la so composición y cadarma fotoperiodística y la calidá’l collor. A la fin, del tercer premiu “Un culín de Sidra”, de la carreñana Mónica González Álvarez destacóse la perorixinalidá de la obra.

Consulta toles semeyes escoyíes pol xuráu