Iniciativa pol Asturianu reclama presencia del asturianu nes desconexones p’Asturies de TVE

Iniciativa pol Asturianu vien de solicitar a la direutora nueva de RTVE n’Asturies, Patricia Álvarez Ramos, un conceyu pa proponer la inclusión del asturianu dientro de la cobertura informativa p’Asturies y pa tratar cuestiones rellatives al usu toponímicu y llingüísticu que se fai na Radio Televisión Pública. La petición coincide con que TVE ta acabante presentar un informativu diariu d’ocho minutos, complementariu a Panorama Regional, “nel qu’otra vuelta la llingua vehicular ye’l castellán”, espliquen dende Iniciativa pol Asturianu.

Dende la organización creen “qu’esti podría ser un bon espaciu pal emplegu del idioma asturianu con total normalidá y una amuesa al ente de comunicación públicu de la demanda qu’hai d’esti tipu de conteníos”, ausentes de la cadena pública dende la esperiencia pilotu nel yá mentáu Panorama Regional.

D’otra miente, dende Iniciativa pol Asturianu esperen que la respuesta de la Directora “seya positiva y podamos sentir l’asturianu na cadena pública española” dempués d’años de lo que califiquen como “ausencia inxustificable”.