Ignaciu Llope presenta en Cangas el poemariu “El combate melancólicu”

La editorial Suburbia organiza güei llunes la presentación del poemariu nuevu d’Ignaciu Llope, “El combate melancólicu”. L’actu va tener llugar a les siete y media la tarde na llibrería Treito de Cangas del Narcea, asitiada na Plaza d’Asturies 4. Amás del autor, van intervenir José Manuel Martínez, alcalde de Cangas del Narcea; Silvia Cosio, editora; y l’escritor Xuan Bello.

Ignaciu Llope, ñaz en Cuideiru nel añu 1961, ye poeta y ensayista. Nel añu 89 publica De les coses del mundu, artículos y ensayos que vinieran la lluz en delles publicaciones: La Voz d’Avilés, Hojas universitarias, Ámbitu, Lletres Asturianes, L’Esperteyu, asina como otros trabayos inéditos. Nel añu 1992 sal al mercáu’l poemariu Xeografía del augua. En 1999 algamó’l premiu de poesía Fernán Coronas col llibru El llugar del sol (Trabe, 2000).

Amás de les revistes citaes a propósitu de los artículos de De les coses del mundu, Llope publicó poesía en diverses revistes como Adréi y Lúnula. Ye tamien conocíu como lletrista del grupu folk Llan de Cubel. Fue ún de los traductores de los dos episodios de Les aventures de Tintín al asturiano.

Ye miembru del conseyu editorial de la revista Lliteratura de l’Academia de la Llingua Asturiana.