Esti domingu aporta a la so fin el XII Festival Intercélticu d’Avilés

El 18 de xunetu entamó la 12 edición del Festival Intercélticu d’Avilés qu’esti añu va desendolcase hasta esti domingu 27 de xunetu y qu’esti añu taba dedicáu a los 1100 años del símbolu nacional d’Asturies: la Cruz de la Victoria y al so cubrición d’oru y piedres fecha pol Rei Alfonsu II el Grande nel añu 908. Los actos desendolquense en delles sedes, como nel Palaciu de Valdecarzana y vien cuntando con representantes de cásique toles naciones celtes: Asturies, Irlanda, Escocia, Bretaña, Gales y Galicia. L’Intercélticu d’Avilés ta declarada fiesta d’interés turísticu asturianu. D’Escocia vinieron al Intercélticu avilesín “Culter & Distric P.B.”, los gaiteros Fred Morrison y Stuart Cassels, “Red Hot Chilli Pipers”, y “Tannahill Weavers”; d’Irlanda tuvieron “Beoga” y “Clasac Irish Dancers”; de Gales l’agrupación de danza “Dawnswyr Tawerin” y de Bretaña la “Bagad Lann Bihoué”, “Merzhin” y “Korriganed Panvrid”. Entamando por Asturies que va ufrir la principal representación nel Festival, los asturianos tan pudiendo disfrutar n’Avilés con Anabel Santiago & Mikel Lee Wolf, “Andolina”, la bandina “La Curuxa”, la banda de gaites Villa de Avilés, la banda de gaites de La Villa, el club colombófilu avilesín, el club La Peonza, el club náutico de Luanco, Dúo Astur, “Esbardu”, “Escontra´l Raigañu”, “Falanoncaduca!”, la cantante de tonada Marisa Valle Roso, “Xaréu d´ochobre”, Rubén Alba y “Pleamar”. Pa finar, dende Galicia vienieron a tocar nel Festival de Naciones Celtes más importante de tolos que se fain n’Asturies, la banda de gaites “Charamuscas” y el grupu de danza tradicional “Inquedanzas”.