Empieza la fase de participación ciudadana na estratexa de Desenvolvimientu Sostenible d’Avilés

L’alcaldesa d’Avilés aconceyaba nos caberos díes del 2015 con entidaes vecinales de La Lluz y Versalles y colos axentes sociales y los grupos municipales pa entamar la redacción definitiva de la estratexa de Desenvolvimientu Urbanu Sostenible ya Integráu (DUSI) d’Avilés.

La DUSI va incluyir les aportaciones de la ciudadanía, que van poder  pronunciase sobre les necesidaes y la so visión de la ciudá al traviés d’una encuesta online disponible na web del cocneyu, en www.aviles.es.

Esta encuesta súmase al entamu de la ronda de contactos de l’alcaldesa Mariví Monteserín y el conceyal Manuel Riola con colectivos y entidaes vecinales programaos pa informar sobre los oxetivos y conteníu d’esti documentu col que’l Gobiernu municipal opta a consiguir financiamientu européu.

Estos aconceyamientos, la encuesta de participación ciudadana y l’aprobación del documentu en Plenu son lo pasos previos pa poder optar a financiamientu de los Fondos Feder de la Unión Europea. Al Principáu asignaron-y 25 millones d’euros de financiamientu pa proyectos DUSI (antiguos planes Urban) que se van partir en concurrencia competitiva ente los proyectos presentaos peles ciudaes asturianes.

La estratexa DUSI d’Avilés empezó a ellaborase n’agostu -a partir de les idees del anterior Gobiernu- primero que se publicar la convocatoria a mediaos de noviembre.