“El rostru impenetrable” va poder vese en TPA a la Carta tol añu

El rostru impenetrable va poder vese na páxina web TPA a la Carta hasta’l 24 d’avientu d’esti añu. Con esti llargumetraxe Gonzali Producciones abría camín al doblaxe cinematográficu na televisión autonómica asturiana. Trátase d’un western fechu n’Estaos Xuníos d’América, que dirixera y protagonizara Marlon Brando, al que tamién acompañaba’l conocíu actor Karl Malden.

La Televisión del Principáu d’Asturies estrenólu nuna emisión el 27 d’avientu de 2013, faciendo dos reposiciones, el 10 de mayu y el 8 setiembre de 2014, con perbonos datos d’audiencia en tolos casos. El versionáu cuntó cola participación de más de venti persones, siendo doblaos los actores principales por Carlos Novoa (Marlon Brando), José Antonio Lobato (Karl Malden), Ana Blanco Rozada (Katy Jurado) y Ana Díaz Morán (Pina Pellicer). El director del doblaxe foi Illán Gonzali.

El Rostru Impenetrable, con un 5,1%, superó l’audiencia media de la cadena del 27 d’avientu de 2013 cuando s’emitiera per primer vegada (4,9%) y del mes (4,7%). Los espacios programaos con anterioridá tuvieron per baxo de la media de TPA -‘Date una vuelta’ 3,9%, y ‘Superasturianos’ 4,5%-. Per otru llau, la película de la tarde en castellanu, Green Lantern (2011), tuvo tamién per baxo d’esta media, al quedar nun 4,4%.

La emisión d’quella, al traviés del hashtag #ElRostruImpenetrable, foi ún de los espacios más comentaos na nueche del vienres 27 d’avientu ente los usuarios de Twitter n’Asturies, xenerando más d’un 80% de comentarios positivos.

La Televisión del Principáu d’Asturies entamó a ufiertar online’l doblaxe al asturianu El rostru impenetrable realizáu por Gonzali Producciones el 10 de xineru d’esti añu y dende esi día algamó les 50000 reproducciones nun periodu de namái que cuatro meses.

Gonzali Producciones tien doblao n’asturianu hasta agora seis llargumetraxes, nueve capítulos d’una serie d’animación y trés curtiumetraxes; asina como otros trés curtiumetraxes en gallego-asturianu. L’últimu d’estos trabayos foi’l versionáu de Dirty Harry, película protagonizada por Clint Eastwood, que tamién emitió la TPA al empiezu d’añu.

La productora publicó en DVD los doblaxes La nueche de los muertos vivientes (inclúi como estra la película White Zombie subtitulada n’asturianu), McLintock, El tercer home, y Los viaxes de Gulliver.