El Muséu Thyssen Andorra abre les sos puertes

El Muséu Carmen Thyssen Andorra abrió les sos puertes esti xueves 16 de marzu  coles mires d’allugar esposiciones temporales “de llargu términu”, según adelantró’l director artísticu de la pinacoteca, Guillermo Cervera, mientres la presentación en Madrid el pasáu mes de xineru.

Estes amueses temporales van tener una duración en redol a los once meses y con un promediu de pieces d’ente 25 y 30, una estructura “más amenorgada” coles mires de buscar “la máxima sostenibilidá” ante un panorama nel que los museos son “deficitarios”.

La primer esposición va ser ‘Escenarios’, una amuesa compuesta por 26 cuadros que van percorrer la hestoria del arte dende finales del sieglu XIX hasta’l tercer cuartu del sieglu XX: l’impresionismu francés y norteamericanu, el fauvismo, el modernismu catalán o l’hiperrealismu son dalgunos de los movimientos representaos nesta propuesta.

En redol a la metá de les obres que van poder vese na amuesa vienen de la colección permanente de Madrid, ente que la otra metá vienen de los archivos de la fundación. Según avanzó Cervera, al llargu plazu la idea va ser que les esposiciones sían mistes, abriendo la posibilidá de collaborar a otros museos. Nesti sentíu, reconoció qu’esiste la posibilidá de realizar amueses conxuntes colos centros de Madrid y Málaga.

La entrada al muséu va costar nueve euros (incluyendo audioguía) y va tener un horariu de 10 hores de la mañana a 19 hores de la tarde, mentantu que les previsiones que remanen el organizadores van ser recibir ente 50.000 y 60.000 visitantes el primer añu. El muséu alcuéntrase na planta baxa del edificiu históricu del Hotel Valira y cuenta con un espaciu de 250 metros cuadraos espositivos, 500 metros cuadraos en total.