José Sierra presenta’l so llibru ‘Un faer políticu municipal’

Editáu por IX d’Asturies ya IX de Grau, l’exalcalde José Sierra presentaba’l so llibru ‘Un faer políticu municipal’ esti vienres no que supón una repasada a les polítiques d’IX y la so execución dende los entamos de la democracia hasta 2007.

Esti vienres día 17 de marzu a les 19:30 h., na Casa de Cultura de Grau/Grau, Izquierda Xunida d’Asturies ya Izquierda Xunida de Grau entamaben l’actu de presentación del llibru Grau: Un faer políticu municipal, de José Sierra, alcalde del conceyu demientres 24 años. Con Pepe Sierra, autor del llibru, facía la presentación Ramón Argüelles, Coordinador d’IX Asturies y José Luis Trabanco, Alcalde de Grau, faciendo les veces de presentador  del actu’l Coordinador d’IX Grau, Isaías González.

El llibru escritu por Sierra recueye nuna perspectiva político y personal y, consecuentemente, suxetiva, del procesu de modernización y progresu del Conceyu de resultes del gobiernu del Grupu Municipal d’IX/PCA a partir de la Democracia, ente 1979 y 2007. Tratase d’una visión en primer persona con datos y resumes “que dan testimoniu de la política d’IX y la so repercusión nel paisaxe y la vida local”. Pepe Sierra, qu’en 1979 llegó a l’alcaldía col sofitu del 80% de los votantes,” repasa nuna decena de capítulos los años que van dende l’entamu de la democracia hasta les elecciones de 2007 al traviés de les ideguees y les polítiques que dexaron la consecución d’infraestructures, equipamientos y servicios, dende los espacios culturales, a los sociu-asistenciales, deportivos, verdes, industriales o aquellos rellacionaos cola calidá de vida nos espacios rurales”.