El Grupu de Baille Tradicional San Félix de Candás cumple 25 años en 2008

Hai venticinco años, nel añu 1983, constituyíase llegalmente’l Grupu de Baille Tradicional San Félix de Candás que taba iguáu por bien de neños y neñes que llevaben yá un tiempu ensayando nel vieyu ximnasiu que’l Náuticu de Carreño tien entá n’El Mueye de la capital del conceyu de Carreño. Y nació con un enfotu qu’entá, tantu tiempu depués, nun s’olvidó: que se caltuvieren les dances, bailles y cantares tradicionales d’Asturies.

Nel caltenimientu d’esi enfotu tuvo un papel perimportante la desapaecida FINI SUÁREZ, una de les meyores pandereteres de la hestoria de la recuperación de la cultura tradicional. Gracies a ella diéronse les primeres investigaciones (qu’apaecen grabaes nos discos Muyeres II y Muyeres. Pasamentu), a les que siguieron otres de dellos cantares, bailles y romances de los conceyos de Carreño y Gozón y que son la base de les nueses actuaciones (que nos llevaron per Bretaña, Francia y Hungría) y les nueses publicaciones (revista El Cuirno, la serie ‘Dances y bailles de los conceyos de Carreño y Gozón’, y la coleición ‘Asturies n’otra dómina’ empobinada a los rapacinos). Amás, el pasáu añu 2007 entamó la ‘X Nueche Celta’, los ‘III Alcuentros cola Cultura Tradicional’ y la ‘II Feria del Discu y el llibru n’asturianu’.

El Grupu de Baille Tradicional “quier entamar a cellebrar yá esti mes de xineru’l so venticinco aniversariu espardiendo la nuesa cultura tradicional tanto ente los más neños (col asoleyamientu del llibru ‘Asturies n’otra dómina. Los bailles y les dances’) como ente los adultos (col cursu de baille tradicional al qu’asisten tolos miércoles más d’una docena de persones del conceyu de Carreño).

Amás, los actos d’esti venticinco aniversariu “van tener un puntu cimeru con un conciertu de música tradicional que se va cellebrar la próxima primavera”.