“El Garrapiellu” estrena directiva con Tino Lozano como presidente

Dempués d’un añu cola directiva dimitida, la Tertulia Cultural “El Garrapiellu” convocó esti sábadu una Xunta Xeneral na que s’escoyó directiva nueva, cola salida de Gloria García, presidenta dende va dellos años. El nuevu presidente ye Tino Lozano, miembru fundador de la Tertulia y dende agora cabezaleru de la directiva de la hestórica asociación.

La Xunta Xeneral celebróse nel Atenéu Obreru de Xixón, la tarde d’esti sábadu pasáu y la directiva escoyida ta formada, amás de pol presidente Lozano, por Vicente Villazon como secretariu, Inacio Rodriguez-Solar como ayalgueru y Marta Valle, Ánxel Nava y Fonsu Fernández como vocales y coordinadores d’estaya.

Pero la Xunta Xeneral de socios sirvió tamién pa tomar otres decisiones como la fecha na que va celebrase la tradicional colocación del ñacimientu na Ilesia Vieya de San Pedro La Collá, en Siero o la collaboración con delles asociones ecoloxistes y culturales pa otres xeres. Otru de los temes tratos foi la celebración del 25 de mayu, esti añu que vien, 2008, nel que se cumplen 200 años del alzamientu contra los franceses n’Asturies.

El Garrapiellu ñació a principios de los años noventa y dende entós vien afalando y organizando actividaes como’l Camín de Xixón a Cuadonga, el Concursu de Cuentos Curtios El Garrapiellu, les Olimpiaes de Xuegos Tradicionales y otres actividaes qu’anime cada añu la vida cultural de Xixón y d’Asturies.