El Garrapiellu entama una charra-coloquiu cola proyección del documental “Asturies, paraísu industrial”

“El Garrapiellu”, grupu cultural bien conocíu por mor de facer tolos años la ruta andariega a dende Xixón a Cuadonga y les Olimpiaes de Xuegos Tradicionales nel muséu Pueblu d’Asturies, ente otres actividaes. Entama güei, xueves 21 de febreru a les 19:30 hores, una charra-coloquiu nos llocales de la Sociedá Cultural Xixonesa, na cai Belmonte de Miranda, 4, entlu. Dcha. en Xixón.

Nesti actu va ponese’l documental “Asturies, Paraísu Industrial”. Amás d’esta película va tar otru ponente, Antonio Rodríguez Dosantos.

El documental, “Asturies, Paraísu Industrial”, ye’l primer llargometraxe dirixíu por Koncha Rodríguez y Kela Coto. Según la propia direutora, Konchi, la so ellaboración foi apasionante, porque al dir avanzando nel trabayu diben alcontrándose con datos tan importantes como pa nun poder inoralos, sobre too no que cinca a los estraños argumentos que se dan a veces pa lluchar escontra del cambéu climáticu. Poro, la grabación foi un auténticu descubrimientu pal propiu equipu.

Konchi lleva cinco años faciendo curtiumetraxes. Nel 2004 presentó al Festival de Cine de Xixón “El aparcamiento”, que foi premiáu na seición del Día d’Asturies, y que dempués foi presentáu n’otros festivales, incluyendo Canadá ya Italia. Antes fizo “La vida en un corto”, documental sobre la vida d’una inmigrante de Cabu Verde en Xixón, subvencionáu pol Principáu d’Asturies.”

Antonio Rodríguez Dosantos ye un activu ecoloxista, direutor del Grupu GREEN, criáu en 1994, y editor d’AsturiasVerde.com. Hai poco espublizó “Historias para mortales”, una recopilación de rellatos, dalgunos premiaos en certámenes lliterarios, que traten temes como la inmigración, la violencia de xéneru, el retornu al pasáu pa liquidalu, los deseos obsesivos, les pantasmes que viven dientro d’ún y los que nos observen dende fuera. Obres escrites con un xeitu góticu y humor ácidu. L’autor esperimenta con estilos nuevos, como’l de les lleendes urbanes, con narraciones con un ritmu cuasi llíricu, como nel casu de “Toda la verdad sobre puertas y portazos”, o cola utilización del xéneru de ciencia ficción pa contar un fábula sobre verdaes y mentires.