El Conceyu Abiertu pola Oficialidá lleva una amuesa d’obres d’arte a Villaviciosa

La IV Amuesa d’Obres d’Arte pola Oficialidá del CAO llegó a Villaviciosa estos díes. Esta cuarta edición de la iniciativa de la plataforma participen ochenta y ocho artistes asturianos que donen el so trabayu pa la financiación de les actividaes d’esta organización que pide la oficialidá de la llingua asturiana. L’Amuesa va siguise d’unes puyes onde van poder mercase les obres y collaborar.

Na inauguración de la esposición tuvieron Fernando Ornosa, representante del CAO, l’artista plásticu Ánxel Nava, del Foru Arte Ciudá, entidá coordinadora de l’Amuesa y dellos artistes con obra espuesta na esposición.

La IV Amuesa va tar abierta nel Centru Cultural de Capristano, en Villaviciosa, hasta’l 12 d’abril. Les puyes pa mercar les obres van facese los sábados 22 de marzu y 12 d’abril de magar les seis de la tarde.

Ente los artistes de la esposición tán Daniel Acevedo, Fernando Alba, José Paredes, Berto Alvarez Peña, Nel Amaro, Ambás, Pablo Armesto, Ernesto Avelino, Noé Baranda, José Bermúdez Patón, Nel Caamaño, Eugenia Capellán, Jesús Castañón, Mario Cervero, Maite Centol, Charo Cimas, Beatriz Corredoira, Melania Fraga, Xulián Fueyo, Miguel Galano, Damián González Velasco, Menchu Hontañón, Kso, Adolfo Manzano, Pablo Maojo, Ángeles Mathieu, Miguel Ángel Medina o Benjamín Menéndez.