El CIS da-y la victoria al PSOE nel 9-M

El Centru d’Investigaciones Sociolóxiques (CSIS) pronostica pa les elecciones del próximu 9 de marzu una victoria del PSOE con un apoyu del 40,2 por cientu y ente 158 y 163 escaños, frente al 38,7 por cientu y ente 153 y 157 escaños que se calcula pal PP, según asoleya esti día Europa Press. La diferencia ente dambos diba ser de 1,5 puntos, la segunda más pequeña de la llexislatura (n’ochobre del 2006 se calcularon 1,4 puntos).

Esti estudiu preelectoral del CIS, presentáu esti vienres nel Congresu, básase en 18.221 entrevistes realizaes en 1.214 conceyos de toa España ente los díes 21 de xineru y 4 de febreru. El marxe d’error ye de más/menos 0,74 puntos.

Según la estimación del CIS, el PSOE ganaría les elecciones col 40,2 por cientu de los votos y perbaxo de los 164 escaños que tien güei, siguíu a 1,5 puntos del PP, que diba algamar el 38,7 por cientu de los sufraxos y ente cinco y nueve escaños más que nesti momentu. Dempués figura IX, con un 5,8 por cientu y cinco o seis escaños, meyor que nel 2004.