Dolce cites cola XV Amuesa de Teatru Amateur d’Avilés hasta payares

L’Amuesa de Teatru Amateur d’Avilés cumple nesti 2021 la so XV edición, y torna, fiel al so públicu, con dolce cites hasta payares. La primera, el llunes, 17 de mayu, foi “Dos suegres y un destín”, del grupu local Santa Bárbara Teatru de Llaranes, pero’l programa va siguir hasta la fin del añu.

Entamada pola conceyalía de Cultura d’Avilés, al traviés de la Fundación Municipal de Cultura y la collaboración de FETEAS (Federación de Grupos de Teatru Amateur del Principáu d’Asturies), les entraes, gratuites, podrán recoyese el xueves previu a cada representación, indicando los datos personales de cada asistente.

Son dolce les sesiones programaes, nos meses de mayu y xunu y, tres la posa del branu, n’ochobre y payares, incluyida la tradicional Gala Fin d’Amuesa, que va tener llugar el llunes 29 de payares.

Tres Dos Suegres y un destín”, podrán esfrutase de les representaciones de les compañíes asturianes Baluarte Teatru, con “Les Cervantas”; Teatru Kumen, con “La comedia de les mentires”; La Capacha, con “La yerba crez nel conventu”; Padre Coll, con “¡Ai si fuera asina!”; Maliayo Teatru, con “Antígona”; L’Horru, con “La consulta del doctor Mateo”; Teatru Oldee, con “Llegó la hora”; Traslluz Teatru, con “De tal palu tal estiella”, y la Compañía Asturiana de Comedies, con “La vengación de la Xana”. L’habitual función d’intercambiu llega dende la vecina Cantabria, de la mano de la Compañía Tela Marinero, con “Nunca ye tarde si…”.

Más información